പുരുഷ ടി20 ലോകകപ്പില് ഇന്ത്യക്കെതിരെ കളിക്കില്ലെന്നു പാകിസ്താന് പ്രഖ്യാപിച്ചെങ്കിലും വനിതാ പോരാട്ടത്തില് ആ വിലക്ക് ഇല്ല. റൈസിങ് സ്റ്റാര്സ് ഏഷ്യാ കപ്പില് ഇന്ത്യ എ- പാകിസ്താന് എ പോരാട്ടം അരങ്ങേറും. നിലവില് ഈ പോരാട്ടത്തിന് പാക് സര്ക്കാര് ബഹിഷ്കരണ നിര്ദ്ദേശം നല്കിയിട്ടില്ല.
ഈ മാസം 13 മുതലാണ് റൈസിങ് സ്റ്റാര്സ് ഏഷ്യാ കപ്പ് പോരാട്ടം അരങ്ങേറുന്നത്. ടി20 ലോകകപ്പില് ഇന്ത്യ- പാക് പോരാട്ടം നിശ്ചയിച്ച അതേ ദിവസമാണ് വനിതാ പോരാട്ടവും അരങ്ങേറുന്നത്. ഈ മാസം 15നാണ് ടി20 ലോകകപ്പിലെ ഇന്ത്യ- പാക് പോരാട്ടം. അതേ ദിവസമാണ് റൈസിങ് സ്റ്റാര്സിലെ വനിതാ മത്സരവും.
വനിതാ പോരാട്ടത്തിനുള്ള പാകിസ്താന് ടീമിനെ കഴിഞ്ഞ ദിവസം പിസിബി പ്രഖ്യാപിച്ചിരുന്നു. ടി20 ലോകകപ്പില് ഇന്ത്യക്കെതിരെ കളിക്കില്ലെന്നു സര്ക്കാര് പ്രഖ്യാപിച്ച് കുറച്ച് മണിക്കൂറുകള്ക്കുള്ളില് തന്നെ റൈസിങ് സ്റ്റാര്സിനുള്ള വനിതാ എ ടീമിനെ പിസിബി പ്രഖ്യാപിച്ചത്. ടൂര്ണമെന്റില് ഇന്ത്യ എ ടീമിനൊപ്പം ഗ്രൂപ്പ് എയിലാണ് പാകിസ്ഥാന് എ ടീം. യുഎഇ, നേപ്പാള് ടീമുകളാണ് ശേഷിക്കുന്നവ.
ടൂര്ണമെന്റില് ഇന്ത്യയെ രാധ യാദവാണ് നയിക്കുന്നത്. മലയാളി താരം മിന്നു മണിയും ടീമിലുണ്ട്. ഉമ്മെ ഹാനിയാണ് പാക് ടീം ക്യാപ്റ്റന്.
Content Highlights- India vs Pakistan women cricket match scheduled despite T20 worldcup match boycotting